ಇಲ್ಲೊಕ್ಕೆಲ್ ತುಳುಚಿತ್ರಕ್ಕೆ ಮುಹೂರ್ತ
ಶ್ರೀ ಗಜನಿ ಪ್ರೊಡಕ್ಷನ್ ಲಾಂಛನದಲ್ಲಿ ಹೊಸ ತುಳುಚಿತ್ರವೊಂದು ತಯಾರಾಗುತ್ತಿದೆ. ಸಿನಿಮಾಕ್ಕೆ ಇಲ್ಲೊಕ್ಕೆಲ್ ಎಂದು ಹೆಸರಿಡಲಾಗಿದೆ. ಸಿನಿಮಾಕ್ಕೆ ಈಗಾಗಲೇ ಬೆಂಗಳೂರಿನ ಪ್ರಶಾಂತ್ ನಗರದ ಮಾರಮ್ಮ ದೇವಸ್ಥಾನದಲ್ಲಿ ಮುಹೂರ್ತ ನಡೆದಿದೆ. ಬೆಂಗಳೂರಿನ ಪುಟ್ಟಣ್ಣ ಕಣಗಾಲ್ ಸ್ಟುಡಿಯೋದಲ್ಲಿ ಮತ್ತು ಕೆ.ಆರ್.ಪುರಂ ಸ್ಟುಡಿಯೋದಲ್ಲಿ ಚಿತ್ರೀಕರಣ ಆರಂಭವಾಗಿದೆ.
ಇಲ್ಲೊಕ್ಕೆಲ್ ಸಂಪೂರ್ಣ ಹಾಸ್ಯಮಯ ಚಿತ್ರವಾಗಿದ್ದು, ಬೆಂಗಳೂರು, ಗೋವಾ ಮತ್ತು ದಕ್ಷಿಣ ಕನ್ನಡ ಜಿಲ್ಲೆಯ ಕರಾವಳಿ ಭಾಗಗಳಲ್ಲಿ ಚಿತ್ರೀಕರಣ ನಡೆಸಲಿದೆ. ನಿತೇಶ್ ಸಾಗರ ಚಿತ್ರಾಪು, ದಿವಾಕರ ಶೆಟ್ಟಿ ಅವರ ಸಹನಿರ್ಮಾಣದಲ್ಲಿ ಡಾ. ಸುರೇಶ್ ಎಸ್. ಚಿತ್ರಾಪು ಸಿನಿಮಾವನ್ನು ನಿರ್ದೇಶಿಸುತ್ತಿದ್ದಾರೆ. ಇವರು ಕೂಡ ಈ ಸಿನಿಮಾಕ್ಕೆ ಸಹನಿರ್ಮಾಪಕರಾಗಿದ್ದಾರೆ.
ಮೂರು ಹಂತಗಳಲ್ಲಿ ಸಿನಿಮಾಕ್ಕೆ ಚಿತ್ರೀಕರಣ ನಡೆಯಲಿದೆ. ರಾಜ್ ಷಾ ಸುಚಿ, ಕಾರ್ತಿಕ್ ಮುಲ್ಕಿ ಸಂಗೀತ ನಿರ್ದೇಶನದಲ್ಲಿ ಕೈ ಜೋಡಿಸಲಿದ್ದಾರೆ. ಮಧು ಗೌಡ ಕ್ಯಾಮಾರದಲ್ಲಿ ದುಡಿಯಲಿದ್ದಾರೆ. ತಾರಾಗಣದಲ್ಲಿ ತುಳುರಂಗ ಭೂಮಿಯ ಬಹುತೇಕ ಕಲಾವಿದರಿದ್ದಾರೆ. ಮುಖ್ಯವಾಗಿ ಕುಸಲ್ದರಸೆ ನವೀನ್ ಡಿ.ಪಡೀಲ್, ಅರವಿಂದ ಬೋಳಾರ್, ಭೋಜರಾಜ್ ವಾಮಂಜೂರು, ವಿಸ್ಮಯ ವಿನಾಯಕ್, ಸತೀಶ್ ಬಂದಲೆ, ಮೈಮ್ ರಾಮ್‍ದಾಸ್, ಪಿಲಿಬೈಲ್ ಯಮುನಕ್ಕ ಖ್ಯಾತಿಯ ಚಂದ್ರಕಲಾ ಮೋಹನ್, ಉಮೇಶ್ ಮಿಜಾರ್ ಚಿತ್ರದಲ್ಲಿದ್ದಾರೆ ಸಿನಿಮಾಕ್ಕೆ ನಾಯಕಿಯನ್ನಾಗಿ ಕನ್ನಡದ ಮೂಲತಃ ತುಳುವರಾದ ಶುಭ ಪೂಂಜಾ ಅವರನ್ನು ಕರೆತರುವ ಪ್ರಯತ್ನ ನಡೆದಿದೆ. ಶುಭ ಪೂಂಜಾ ಕನ್ನಡ, ತೆಲುಗು, ತಮಿಳು ಮಲಯಾಳಂ ಸೇರಿದಂತೆ ದಕ್ಷಿಣ ಭಾರತದ ಬೇರೆ ಭಾಷಾ ಚಿತ್ರಗಳಲ್ಲಿ ಅಭಿನಯಿಸಿದವರು. ತನ್ನ ಮಾತೃಭಾಷೆ ತುಳುವಿನಲ್ಲಿ ಅಭಿನಯಿಸುತ್ತಿರುವ ಮೊದಲ ಚಿತ್ರ ಇದಾಗಲಿದೆ.