ಸರಕಾರದ ಏಕೈಕ ಕಂಬಳಕ್ಕೆ ಮತ್ತೆ ವಿಘ್ನ: 4 ಬಾರಿ ನಡೆದ ಪಿಲಿಕುಳ ಕಂಬಳಕ್ಕೆ ಈ ಬಾರಿ ವಿರೋಧ!
ಮಂಗಳೂರು: ದಕ್ಷಿಣ ಕನ್ನಡ ಜಿಲ್ಲೆಯ ಪ್ರಸಿದ್ಧ ಪಿಲಿಕುಳ ಕಂಬಳಕ್ಕೆ ತಯಾರಿ ನಡೆಯುತ್ತಿದೆ. ಆದರೆ ಅತ್ತ ಅದಕ್ಕೆ ಸಾಲು ಸಾಲು ಅಡ್ಡಿ ಆತಂಕಗಳು ಕೂಡ ಎದುರಾಗುತ್ತಿವೆ. ಕಂಬಳ ಆಯೋಜನೆಯಿಂದ ಡಾ. ಶಿವರಾಮ ಕಾರಂತ ಜೈವಿಕ ಉದ್ಯಾನವನದಲ್ಲಿನ ಪ್ರಾಣಿಗಳಿಗೆ ತೊಂದರೆಯಾಗಲಿದೆ ಎಂದು ಜಿಲ್ಲಾಡಳಿತಕ್ಕೆ ಪತ್ರ ಬರೆಯಲಾಗಿದೆ. ಇದು ಪೇಟಾಕ್ಕೆ ಅಸ್ತ್ರವಾಗಿ ಪರಿಣಮಿಸಿದ್ದು, ಅದು ಕರ್ನಾಟಕ ಹೈಕೋರ್ಟ್ ಮೆಟ್ಟಿಲೇರಿದೆ.
ರಾಜ್ಯದ ಏಕೈಕ ಸರಕಾರಿ ಕಂಬಳಕ್ಕೆ ಈಗಾಗಲೇ ಪಿಲಿಕುಳದಲ್ಲಿ ಸಿದ್ಧತೆ ಆರಂಭಗೊಂಡಿದ್ದು, ಕರೆ ನಿರ್ಮಾಣ ಕಾರ್ಯ ಸಂಪೂರ್ಣಗೊಂಡಿದೆ. ಈ ಮಧ್ಯೆ ಕಂಬಳ ಆಯೋಜನೆಯಿಂದ ಪ್ರಾಣಿಗಳಿಗೆ ತೊಂದರೆಯಾಗಲಿದೆ ಎಂದು ಅಧಿಕಾರಿಗಳು ಜಿಲ್ಲಾಡಳಿತಕ್ಕೆ ನೀಡಿರುವ ಪತ್ರವೊಂದು ಪೇಟಾಕ್ಕೆ (ಪ್ರಾಣಿದಯಾ ಸಂಘ) ಅಸ್ತ್ರವಾಗಿ ಹೈಕೋರ್ಟ್‌ನಲ್ಲಿ ಕಂಬಳ ವಿರುದ್ಧ ಕಾನೂನು ಸಮರಕ್ಕೆ ಕಾರಣವಾಗಿದೆ.
ಕಂಬಳ ತುಳುನಾಡಿನ ಜಾನಪದ ಕ್ರೀಡೆಯಾಗಿದ್ದು, ದೇಶ- ವಿದೇಶದಲ್ಲಿ ತನ್ನ ಛಾಪು ಮೂಡಿಸಿದೆ. ಅದರಲ್ಲೂ 2014ರಲ್ಲಿ ಕಂಬಳ ಕ್ರೀಡೆ ಕಾನೂನು ತೊಡಕಿನಿಂದಾಗಿ ನಿಷೇಧವಾದಾಗ ಇಡೀ ಕರುನಾಡು ಕಂಬಳ ಪರ ಹೋರಾಟಕ್ಕೆ ನಿಂತಿತು. ಇದನ್ನು ಗಂಭೀರವಾಗಿ ಪರಿಗಣಿಸಿದ ಕೇಂದ್ರ ಸರಕಾರ ರಾಷ್ಟ್ರಪತಿ ಸುಗ್ರೀವಾಜ್ಞೆ ಮೂಲಕ ಕಂಬಳಕ್ಕೆ ಅವಕಾಶ ಮಾಡಿಕೊಟ್ಟಿತ್ತು. ಅಲ್ಲದೆ ರಾಜ್ಯ- ಕೇಂದ್ರ ಸರಕಾರ ಕಾನೂನಿಗೆ ತಿದ್ದುಪಡಿ ಮಾಡಿ ಅಧಿಕೃತವಾಗಿ ಕಂಬಳ ಕ್ರೀಡೆಗೆ 2017ರ ಫೆಬ್ರವರಿಯಲ್ಲಿ ಅನುಮತಿ ನೀಡಿತು. ಈ ಮೂಲಕ ಕಂಬಳಕ್ಕಿದ್ದ ಅಡೆತಡೆಗಳು ನಿವಾರಣೆಯಾಗಿ ಮತ್ತೆ ಗತವೈಭವ ಪಡೆದುಕೊಂಡಿತು.
ಕಂಬಳಕ್ಕಿದ್ದ ವಿಘ್ನ ನಿವಾರಣೆಯಾದ ಬಳಿಕ ರಾಜ್ಯದ ಏಕೈಕ ಸರಕಾರಿ ಕಂಬಳ ‘ಪಿಲಿಕುಳ ಕಂಬಳ’ವನ್ನು ಮತ್ತೆ ನಡೆಸಬೇಕೆಂಬ ಒತ್ತಾಯ ಕಂಬಳಾಭಿಮಾನಿಗಳಿಂದ ಕೇಳಿ ಬಂದಿತ್ತು. 2008-2014ರ ವರೆಗೆ ಒಟ್ಟು 6 ಕಂಬಳಗಳು ಪಿಲಿಕುಳ ಗುತ್ತಿನ ಮನೆಯ ಮುಂಭಾಗ ನಡೆದಿವೆ. ಕಾನೂನು ತೊಡಕು, ಕೋವಿಡ್‌ ಕಾರಣದಿಂದ ನಿಂತು ಹೋಗಿದ್ದ ಪಿಲಿಕುಳ ಕಂಬಳವನ್ನು ಮತ್ತೆ ಆರಂಭಿಸಲು ಜಿಲ್ಲಾಡಳಿತ ನಿರ್ಧರಿಸಿತ್ತು.
ಈ ಸೀಸನ್‌ನಲ್ಲಿ ಪಿಲಿಕುಳ ಕಂಬಳಕ್ಕೆ ನ.9ರಂದು ದಿನ ನಿಗದಿಪಡಿಸಲಾಗಿತ್ತು. ಆದರೆ ಮೂಡುಶೆಡ್ಡೆ ಗ್ರಾಮ ಪಂಚಾಯಿತಿ ಚುನಾವಣೆ ಹಿನ್ನೆಲೆಯಲ್ಲಿ ನೀತಿ ಸಂಹಿತೆ ಕಾರಣದಿಂದ ಪಿಲಿಕುಳ ಕಂಬಳ ಮುಂದೂಡಲು ನಿರ್ಧರಿಸಿ ನ. 17-19ಕ್ಕೆ ನಿಗದಿಪಡಿಸಲಾಗಿತ್ತು. ಆದರೆ ಪಿಲಿಕುಳ ಕಂಬಳಕ್ಕೆ ಪಿಲಿಕುಳದಲ್ಲಿರುವ ಡಾ. ಶಿವರಾಮ ಕಾರಂತ ಜೈವಿಕ ಉದ್ಯಾನವನದ ನಿರ್ದೇಶಕ ಜಯಪ್ರಕಾಶ್‌ ಭಂಡಾರಿ ವಿರೋಧ ವ್ಯಕ್ತಪಡಿಸಿ, ಇದರಿಂದ ಮೃಗಾಲಯದ ಪ್ರಾಣಿಗಳಿಗೆ ತೊಂದರೆಯಾಗಲಿದೆ ಎಂದು ಜಿಲ್ಲಾಧಿಕಾರಿಗೆ ಪತ್ರ ಬರೆದಿದ್ದರು. ಇದನ್ನೇ ಪ್ರಮುಖ ಅಸ್ತ್ರವಾಗಿಸಿಕೊಂಡ ಪೇಟಾ ಹೈಕೋರ್ಟ್‌ನಲ್ಲಿ ಈ ಬಗ್ಗೆ ತಕರಾರೆತ್ತಿದ್ದು, ಪಿಲಿಕುಳ ಕಂಬಳ ನಡೆಸಬಾರದೆಂದು ವಾದ ಮಂಡಿಸಿದೆ.
ಪಿಲಿಕುಳದಲ್ಲಿ ಪ್ರಾಣಿಗಳಿಗೆ ತೊಂದರೆ ಆಗಲಿದೆಯೇ ಎಂಬ ಬಗ್ಗೆ ಅಧ್ಯಯನ ನಡೆಸಲು ಜಿಲ್ಲಾಧಿಕಾರಿ ಅವರು ಮೈಸೂರಿನ ಶ್ರೀ ಚಾಮರಾಜೇಂದ್ರ ಮೃಗಾಲಯದ ಉಪನಿರ್ದೇಶಕಿ ಸಿ.ವಿ. ದೀಪಾ, ಪಶುಸಂಗೋಪನೆ ಮತ್ತು ಪಶು ವೈದ್ಯಕೀಯ ಸೇವಾ ಇಲಾಖೆಯ ಮಂಗಳೂರು ಉಪನಿರ್ದೇಶಕ ಡಾ.ಅರುಣಕುಮಾರ್‌ ಶೆಟ್ಟಿ, ಎನ್‌ಐಟಿಕೆ ಸುರತ್ಕಲ್‌ನ ಪ್ರಾಧ್ಯಾಪಕ ಪೊ.ಶ್ರೀನಿಕೇತನ್‌, ಕರ್ನಾಟಕ ರಾಜ್ಯ ಮಾಲಿನ್ಯ ನಿಯಂತ್ರಣ ಮಂಡಳಿ ಬೈಕಂಪಾಡಿ ಮಂಗಳೂರು ಇಲ್ಲಿನ ಪರಿಸರ ಅಧಿಕಾರಿ ಲಕ್ಷ್ಮೀಕಾಂತ್‌ ಕೆ. ಅವರನ್ನೊಳಗೊಂಡ ಸಮಿತಿ ರಚಿಸಿದ್ದಾರೆ. ಈ ತಾಂತ್ರಿಕವಾಗಿ ಅಧ್ಯಯನ ನಡೆಸಿ ಸ್ಪಷ್ಟ ಅಭಿಪ್ರಾಯದೊಂದಿಗೆ ಎರಡು ವಾರದೊಳಗೆ ವರದಿ ಸಲ್ಲಿಸಲಿದೆ. ಈ ವರದಿಯನ್ನು ಅಡ್ವಕೇಟ್‌ ಜನರಲ್‌ ಶಶಿಕಿರಣ್‌ ಶೆಟ್ಟಿ ಹೈಕೋರ್ಟ್‌ಗೆ ಹಾಜರುಪಡಿಸಲಿದ್ದಾರೆ. ಈ ಪ್ರಕರಣದ ವಿಚಾರಣೆಯನ್ನು ಡಿ.4ಕ್ಕೆ ಮುಂದೂಡಲಾಗಿದೆ.
ಪಿಲಿಕುಳದಲ್ಲಿ 2008ರಿಂದ 2014ರ ವರೆಗೆ ಜಿಲ್ಲಾಡಳಿತ 6 ಬಾರಿ ಕಂಬಳ ನಡೆಸಿದ್ದು, ಈ ಸಂದರ್ಭ ಈಗ ಆಕ್ಷೇಪ ವ್ಯಕ್ತಪಡಿಸಿ ಜಿಲ್ಲಾಧಿಕಾರಿಗೆ ಪತ್ರ ಬರೆದ ಪಿಲಿಕುಳ ಜೈವಿಕ ಉದ್ಯಾನವನದ ಜಯಪ್ರಕಾಶ್‌ ಭಂಡಾರಿ ಅವರೇ ಕಂಬಳ ವ್ಯವಸ್ಥಾಪಕರಲ್ಲಿ ಒಬ್ಬರಾಗಿದ್ದರು. ಆಗ ಯಾವುದೇ ವಿರೋಧ ವ್ಯಕ್ತಪಡಿಸದ ಜಯಪ್ರಕಾಶ್‌ ಭಂಡಾರಿ ಅವರು ಈಗ ವಿರೋಧ ಮಾಡುತ್ತಿರುವುದು ಹಲವು ಪ್ರಶ್ನೆ, ಅನುಮಾನಗಳನ್ನು ಹುಟ್ಟು ಹಾಕಿದೆ.
