ಉಚ್ಚಿಲ: ಮಹೀಂದ್ರ ಡ್ಯೂರೋ ದ್ವಿಚಕ್ರ ವಾಹನಕ್ಕೆ ಮಿನಿ ಬಸ್ಸು ಡಿಕ್ಕಿ ಹೊಡೆದ ಪರಿಣಾಮ ದ್ವಿಚಕ್ರ ಸವಾರ ತಲೆಗೆ ಗಂಭೀರ ಗಾಯಗೊಂಡು ಆಸ್ಪತ್ರಗೆ ಕೊಂಡೊಯ್ಯುವ ವೇಳೆ ಮೃತಪಟ್ಟ ಘಟನೆ ರಾ.ಹೆ. 66 ಬಡಾ ಉಚ್ಚಿಲ ಬಳಿ ಸೋಮವಾರ ಬೆಳಿಗ್ಗೆ ನಡೆದಿದೆ.
ಗಂಭೀರ ಗಾಯಗೊಂಡು ಮೃತಪಟ್ಟವರನ್ನು ಉಚ್ಚಿಲ ಭಾಸ್ಕರ ನಗರ ವಾಸಿ ವೈ.ಎಸ್. ಅಹಮದ್ (70) ಎಂದು ಗುರುತಿಸಲಾಗಿದೆ.
ಪರಿಸರದಲ್ಲಿ ಮೀಸೆ ಅಹಮ್ಮದ್ ಎಂದೇ ಪ್ರಸಿದ್ಧರಾದ ಅವರು ಸೋಮವಾರ ಮನೆಗೆ ತೆರಳಲು ಬರುತ್ತಿದ್ದಾಗ ಭಟ್ಕಳದಿಂದ ಮಂಗಳೂರಿಗೆ ಬರುತ್ತಿದ್ದ ಮಿನಿ ಬಸ್ಸು, ದ್ವಿಚಕ್ರ ವಾಹನಕ್ಕೆ ಡಿಕ್ಕಿ ಹೊಡೆದಿತ್ತು. ಈ ಸಂದರ್ಭ ರಸ್ತೆಗೆ ಎಸೆಯಲ್ಪಟ್ಟ ಅಹಮ್ಮದ್ ಅವರ ತಲೆಗೆ ಗಂಭೀರ ಗಾಯವಾಗಿ ಅಸುನೀಗಿದ್ದಾರೆ.
ಉಚ್ಚಿಲ ಪರಿಸರದಲ್ಲಿ ಕೋಮು ಸಂಘರ್ಷ ಸಂದರ್ಭ ಕೋಮು ಸೌಹಾರ್ದತೆಗಾಗಿ ಶ್ರಮಿಸಿ ಯಶಸ್ವಿಯಾಗುತ್ತಿದ್ದ ಅವರು, ಬಡಾಗ್ರಾಮದ ಕಾಂಗ್ರೆಸ್ ಸ್ಥಾನೀಯ ಸಮಿತಿ ಅಧ್ಯಕ್ಷರಾಗಿ ಸುದೀರ್ಘ ಕಾಲ ಕಾರ್ಯನಿರ್ವಹಿಸಿದ್ದರು. ಹಲವು ವರ್ಷ ಕಾಲ ಸ್ಥಳೀಯ ಗ್ರಾ.ಪಂ ಸದಸ್ಯರಾಗಿಯೂ ಸೇವೆ ಸಲ್ಲಿಸಿದ್ದರು.
ಅವರಿಗೆ ಪತ್ನಿ, 3 ಪುತ್ರರು, 3 ಪುತ್ರಿಯರು ಇದ್ದಾರೆ.
ಪಡುಬಿದ್ರಿ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.