ಡೊನಿ ಲೋಬೊ ಅಂತರ್ಲೊ
ಮಂಗ್ಳುರ್ ಮಿಲಾರ್‍ಚೊ ‘ವಾಗ್’ ಮ್ಹಣ್ ನಾಂವಾಡ್ಲಲೊ ಖ್ಯಾತ್ ವಕೀಲ್ ದೆವಾಧಿನ್ ಕೈತಾನ್ ಲೋಬೊ ಆನಿ ದೆವಾದಿನ್ ಮಿಲ್‍ಡ್ರೆಡ್ ಲೋಬೊಚೊ ಪೂತ್ ಡೊನಿ ಲೋಬೊ ದಸೆಂಬರ್ 26ವೆರ್ ಚೆನ್ನೆಯಿಂತ್ ಅಂತರ್ಲೊ. ಸರ್ತಾನಾ ತಾಕಾ 67 ವರ್ಸಾಂ ಪ್ರಾಯ್.
ಡೊನಿ ನಾಮ್ಣೆಚೊ ಕೊಂಕ್ಣಿ ಸಂಗೀತ್‍ಗಾರ್ ಆನಿ ಗಾವ್ಪಿ. ಮಿಲಾರ್‍ಚಾ ಕೊಯರಾಂತ್ ಮಧುರ್ ತಾಳ್ಯಾನ್ ಗಾವ್ನ್ ಆಸ್‍ಲ್ಲ್ಯಾ ತಾಕಾ ಕೊಂಕ್ಣಿಂತ್ಲೊ ಜಿಮ್ ರೀವ್ಸ್ ಮ್ಹಣ್ ಆಪಯ್ತಾಲೆ. 80ವ್ಯಾ ದಶಕಾಂತ್ ಬೆಂದುರ್‍ಚಾ ಫಿಲ್‍ಹಾರ್ಮೊನಿಕ್ ಕೊಯರಾಚಾ ಥೊಡ್ಯಾ ಸಾಂದ್ಯಾಂಕ್ ಆನಿ ಹೆರ್ ಕಲಾಕಾರಾಂಕ್ ಘೆವ್ನ್ ತಾಣೆಂ ತಯಾರ್ ಕೆಲ್ಲ್ಯೊ ಕೊಂಕ್ಣಿ ಸಾಂಪ್ರದಾಯಿಕ್ ಪದಾಂಚ್ಯೊ ದೋನ್ ಕೊವ್ಳ್ಯೊ ಭಾರಿಚ್ ಲೊಕಾಮೊಗಾಳ್ ಜಾಲ್ಲ್ಯೊ.
ಸಾಂ ಲುವಿಸ್ ಕೊಲೆಜಿಂತ್ ಪದ್ವೆಚೆಂ ಶಿಕಪ್ ಸಂಪ್ತಚ್ ಪ್ರೋಕ್ಟರ್ ಏಂಡ್ ಗ್ಯಾಂಬಲ್ ಕಂಪೆನಿಂತ್ ಥೊಡಿಂ ವರ್ಸಾಂ ಕಾಮ್ ಕರುನ್ ಉಪ್ರಾಂತ್ ತೊ ಖತಾರ್ ಪಾವ್ಲೊ.
ಖತಾರ್ ಭಾಗೆವಂತ್ ರೊಜಾರ್ ಮಾಯೆಚಾ ಇಗರ್ಜಿಚಾ ಚಟುವಟಿಕೆಂನಿ ಕ್ರಿಯಾಳ್ ಭಾಗ್ ಘೆವ್ನ್ ಆಸ್‍ಲ್ಲೊ ತೊ ಭುರ್ಗ್ಯಾಂಚೆಂ ಕೊಯರ್ ಚಲಯ್ತಾಲೊ. ಖತಾರ್‍ಚಾ ಕೊಂಕ್ಣಿ ಸಂಗೀತ್ ಕಾರ್ಯವಳಿಂನಿ ಭಾಗ್ ಘೆತಾಲೊ.ವಿವಿಧ್ ವ್ಹಾಜಂತ್ರಾಂ ವ್ಹಾಜಂವ್ಚಾಂತ್ ಪ್ರವೀಣ್ ಜಾವ್ನಾಸ್ಚಾ ತಾಣೆಂ ಸಬಾರ್ ಭುರ್ಗ್ಯಾಂಕ್ ಸಂಗೀತ್ ಶಿಕಯ್ಲಾಂ. 1986-ಂತ್ ಫೆಲಿಕ್ಸ್ ಲೋಬೊಚಾ ಮುಕೆಲ್ಪಣಾರ್ ಖತಾರಾಂತ್
ಪಯ್ಲೆಪಾವ್ಟಿಂ ಕೊಂಕ್ಣಿ ಕಲ್ಚರಲ್ ಎಸೋಸಿಯೇಶನ್ ಆರಂಬ್ ಕರುನ್ ಪಯ್ಲ್ಯಾನ್ ಪಯ್ಲಿ ಕೊಂಕ್ಣಿ ಸಂಗೀತ್ ಸಾಂಜ್ ಸಾದರ್ ಕರ್ಚಾಂತ್ ಡೊನಿ ಲೋಬೊಚೊಯಿ ಸಹಕಾರ್ ಆಸ್‍ಲ್ಲೊ.
ಖತಾರಾಂತ್ಲ್ಯಾ ಎಕಾ ಬಹುರಾಶ್ಟ್ರೀಯ್ ಕಂಪೆನಿಂತ್ ಸೇಲ್ಸ್ ಮೆನೆಜರ್ ಜಾವ್ನ್ ವಾವುರ್ಲಲೊ ತೊ ಥೊಡ್ಯಾ ವರ್ಸಾಂ ಆದಿಂ ನಿವೃತ್ ಜಾವ್ನ್ ಆಪ್ಲಿ ಪತಿಣ್ ತೆಕ್ಲಾ ಆನಿ ಧುವ್ ಶಾರ್ಮೇನ್ ಹಾಂಚೆಸಂಗಿಂ ಚೆನ್ನೆಯಿಂತ್ ವಸ್ತಿ ಕರುಂಕ್ ಲಾಗ್ಲೊ.
ಸಾಸ್ಣಿಕ್ ಶಾಂತಿ ತಾಕಾ ಲಾಭೊಂ.
ಸಿಜ್ಯೆಸ್
