Spread the love
ಭುಕ್ ಆನಿ ಸೊದ್ನಾಂ
ಕಾಳಿಜ್ ಕಡ್ಲೆಂ ಪಿಂತುರ್ ಹೆಂ ಚೊಯ್ತಾನಾ
ಗೋಣಿ ಖಾಂದಾರ್ ಫಾಲ್ನ್ ಏಕ್ ಬಾಳ್ ಚಲ್ತಾನಾ
ಭಂವ್ತಣಿಂ ಕಚೊ, ಆಸಾ ಕೊಣಾಕ್ ಹುಸ್ಕೊ?
ಹೆಂ ನೆಂಟೆಂ ಚೊಯ್ತಾ, ಮೆಳಾತ್ಗೀ ಕಾಂಯ್ ಉಸ್ಟೆಂ
ಪಾಲ್ವೊಂಕ್ ಉಜೊ ಭುಕೆಚೊ?
ರಚ್ತಾನಾ ತುವೆಂ ಕಿತ್ಯಾ ರಚ್ಲಾಂಯ್ ಅಶೆಂ?
ಗ್ರೇಸ್ತಾಕ್ ಸರ್ವ್, ದುಬ್ಳ್ಯಾಕ್ ಕಾಂಯ್ ನಾ ಕಶೆಂ?
ಹ್ಯಾ ನೆಂಟ್ಯಾಚಿ ಚೂಕ್ ತರೀ ಕಿತೆಂ?
ಗೊಣಿ ಖಾಂದ್ಯಾರ್ ಘಾಲ್ನ್ ಸೊದ್ತಾ ಭುಕೆನ್ ರಿತೆಂ?
ಖಂಯ್ ಆಸಾತ್ ತಾಚಿಂ ಜಲ್ಮ್ ದಾತಾರಾಂ?
ಮತಿಂತ್ ಮ್ಹಜ್ಯಾ ಹಜಾರ್ ಚಿಂತ್ನಾಂ ಲ್ಹಾರಾಂ
ದೆವಾನ್ ಥೊಡ್ಯಾಂಕ್ ದಿಲಾಂ ಧಾರಾಳ್
ಥೊಡ್ಯಾಂಚಿ ಜಿಣಿ ಜಾಲ್ಯಾ ಕರಾಳ್
ದೀವ್ನಾ ವಸ್ತಿ ಕರುಂಕ್ ಪುರ್ತೆಂ ಏಕ್ ಥಳ್
ಹೆಂ ಸರ್ವ್ ರಚ್ನಾರಾಚ್ಯಾ ರಚ್ನೆಚೊ ಖೆಳ್
ಮನ್ಶ್ಯಾ ಜಿಣ್ಯೆಂತ್ ಭುಕೆಚೊ ತಾಂಡವ್
ಕಿತ್ಲ್ಯೊ ಕುಡಿ ಜಾಲ್ಯೊ ನಿರ್ಜೀವ್
ನೆಂಟೆ ಹೆಂ ಬಾಳ್, ಕಚ್ರ್ಯಾ ಭೊಂವಾರಿಂ ಉಬೆಂ
ಜಾಣಾಂಗೀ ತೆಂ ಕಿತೆಂ ಬರೆಂ ಆನಿ ಕಿತೆಂ ಖೊಟೆಂ?
ಜಲ್ಮಾಲ್ಲ್ಯಾ ಚುಕಿಕ್ ಭೊಗ್ತಾ ಕಶ್ಟ್ ಖರೆಂ
ಪೋಟ್ ಭರುಂಕ್ ಸದಾಂ ಉಸ್ತಿತಾ ಸಾರೆಂ
ವಾಯ್ಲೆಟ್ ಪಿರೇರಾ
Also read
Spread the love
